Adduden n yiselmaden n tmaziɣt akked yinelmaden n ulmud alemmas ɣef udlisfus n uswir wis ukkuẓ
Loading...
Date
2022
Authors
Journal Title
Journal ISSN
Volume Title
Publisher
Université Mouloud Mammeri Tizi-Ouzou
Abstract
Tutlayt n tmaziɣt tudef ɣer uɣerbez azzayri deg useggas 1995, aselmed-is ur yeqqim
ara akken yebda, imi tger asurif ɣer sdat. Abeddel deg unagraw n usegmi i d-yellan deg
useggas n 2003, yegla-d s usutteb n kra n wallalen n tsensegmit, ad nebder gar-asen ahilen
d yidlisfusen i d-iheyya uɣlif n usegmi i kraḍ n yiswiren. Adlisfus n tmaziɣt ɣur-s azal d
ameqqran deg usnerni n tmusniwin n unelmad. Aṭas n yimsikden d yimussnawen n
tesnalmudt i yerran lwelha ɣer lexṣas n yigburen n wahilen d yidlisfusen n tmaziɣt, aladɣa
deg uswir n ulmud alemmas.
Deg umahil-a, neɛreḍ ad d-nesbeggen tilawt n udlisfus n useggas wis ukkuẓ n ulmud
alemmas, akken ad d-nerr ɣef yiseqsiyen igejdanen iɣef tbedd tezrawt-a. Ad d-nesmekti,
nexdem amahil-a s usentel “Adduden n yiselmaden n tmaziɣt akked yinelmaden n ulmud
alemmas ɣef udlisfus n useggas wis ukkuẓ”, i ibedden ɣef kraḍ n yiseqsiyen igejdanen
yellan deg tmukrist, aseqsi amenzu d andi ɣef tmuɣli n yinelmaden d yiselmaden n useggas
wis ukkuẓ ɣef udlisfus n tmaziɣt, aseqsi wis sin ɣef wuguren i d-ttemlilen deg usemres-is
deg uselmed d ulmad.
Deg tezrawt-a i nga, nessaweḍ ad d-nessisen timuɣliwin yemgaraden n yinelmaden d
yiselmaden ɣef udlisfus akked usemres-is. Akken ad d-negmer ugar n tmuɣliwin d yisallen
i yerzan asentel-nneɣ, nheyya-d sin yimseqsiyen, amenzu i yinelmaden, ma d wis sin i
yiselmaden n sin wasunen deg lwilaya n Tizi Wezzu (Buzgan d Yiferḥunen).
Tuget n yiselmaden iɣer d-negmer isalan d imuzzag n taɣult, imi akk sɛan agerdas n
turagt n tutlayt d yidles amaziɣ.
Tasleḍt n yiseqsiyen i d-nefka deg yimseqsiyen, tessaweḍ-aɣ ad nẓer igemmaḍ ɣef
wayen i nettnadi, imi s umata adlisfus iɣef nga tazrawt ixus deg lebni-s almend n talɣa d
tɣra. Ad t-naf yebḍa ɣef kraḍ n yiḥricen i yuran s yisekilen n tira yemgaraden, d ayen ur
yettɛawanen ara inelmaden. Iselmaden ur asen-teɛǧib ara talɣa d tɣara n udlisfus-a, d ayen
ara aɣ-yeǧǧen ad d-nessentem turda tamezwarut.
Ayen yerzan uguren i d-ttemlilen yinelmaden d yiselmaden deg usemres n udlisfus,
deg tazwara d iḍrisen i yellan deg-s, imi iselmaden s umata ur ttafen ara ayen ḥwaǧen i
uselmed acku ttwatun s tantaliwin-nniḍen n tmaziɣt deg-s tacawit d temẓabit. Iḍrisen-a
xussen deg usummen, imi llan wid ur nesɛi ara tugniwin neɣ ur laqent ara, d ayen i ten yeǧǧan ur ttilin ara d imalɣaden. Ma d inelmaden yesɛan adlisfus, semrasen-t i tɣuri n
yinzan d yisefra, ula d wi tikwal kan i teqqaren.
Tin ɣer-s d iferdisen n tutlayt, xas ttɛawanen anelmad akken ad xedmen asenfar,
maca ad naf amur ameqqran n yirmad i yellan ur llin ara deg tgezmin d yisenfaren
iwulmen, llan wid ilaqen i tesnawit. S yisalan-a i d-negmer sɣur yinelmaden d yiselmaden,
nessaweḍ ad d-nessentem turda tis snat i d-nefka “ Iselmaden d yinelmaden ttemlilin-d
uguren deg usemres n udlisfus ”.
Almend n yisalan i d-negmer, igburen n udlisfus mačči d ufrinen ilaqen i uselmed
deg uswir-a.
Aselmed n tutlayt n tmaziɣt, d amaynut deg tmurt n Lezzayer, ɣef waya ilaq ad ilin
ugar n yinadiyen ɣef tesnalmudt n tutlayt-a, imi aṭas n wuguren i d-ttemlilen yiselmaden d
yinelmaden. Tazrawt-nteɣ terza asentel n udlisfus, nessaram d tin ara d-igen iberdan i
tezrawin-nniḍen, ara yilin d afud i tutlayt n tmaziɣt.
Description
67p.; Table.; 30cm.(+cd)
Keywords
Citation
TAZRAWT N TESNILEST